ठाणे : महापालिकेच्या वर्तकनगर येथील डॉ. आनंदीबाई जोशी रुग्णालयाच्या इमारतीचा तातडीने पुनर्विकास करण्याचे आदेश महापौर मिनाक्षी राजेंद्र शिंदे यांनी रुग्णालयाच्या पाहणी दौऱ्यादरम्यान प्रशासनास दिले.
वर्तकनगर येथील महापालिकेच्या डॉ. आनंदीबाई जोशी रुग्णालयात शॉटसर्किट झाले. सुदैर्वाने या दुर्घटनेमध्ये कोणतीही हानी झाली नाही. या दुर्घटनेच्या पार्श्वभूमीवर सदर रुग्णालयाची पाहणी महापौर यांनी केली. या पाहणी दौऱ्यास उपमहापौर रमाकांत मढवी, स्थानिक नगरसेविका विमल भोईर तर प्रशासनाचे वतीने उपायुक्त अशोक बुरपल्ले, सहाय्यक आयुक्त चारुशिला पंडित, कार्यकारी अभियंता सुधीर गायकवाड, प्रदीप घाडगे, कनिष्ठ अभियंता रणधीर राणे, शैलेश हर्डीकर आदी उपस्थित होते.
डॉ. आनंदीबाई जोशी रुग्णालयाची इमारत २८ वर्षे जुनी आहे. सदर इमारतीच्या पुनर्बांधणीचा प्रस्ताव सन २०१७-१८च्या अर्थसंकल्पामध्ये मांडण्यात आला असून, यासाठी आर्थिक तरतूद केली असल्याची माहिती महापौर यांनी या वेळी दिली.
वर्तकनगर, लोकमान्यनगर, शास्त्रीनगर, येऊर, उपवन, स्वातंत्र्यवीर सावरकरनगर, पवारनगर व वागळे इस्टेट विभागातील रुग्ण येथे उपचारासाठी येत असतात. सध्याची लोकसंख्या विचारात घेऊन वाढीव खाटांचे अद्ययावत रुग्णालय उभारण्याचा प्रस्ताव तयार करण्याचे आदेश यापूर्वी प्रशासनास दिलेले आहेत.
डॉ. आनंदीबाई जोशी रुग्णालयात येणारे रुग्ण हे आर्थिकदृष्टया दुर्बल घटकातील असतात, गोरगरीब नागरिकांना वरदान ठरलेल्या रुग्णालयाचा पुनर्विकास तातडीने करुन येथे आवश्यक व अद्ययावत सेवा-सुविधा उपलब्ध करुन देण्यात येतील याबाबत आपण व्यक्तिश: लक्ष घालणार असल्याने येत्या २ ते ३ वर्षात सर्व सेवा-सुविधांनी युक्त असे रुग्णालय नागरिकांना उपलब्ध होईल अशी आशा महापौर यांनी या वेळी व्यक्त केली.